يا مجلس يا عسكرى ، لقد هرمنا و ورمنا #NoSCAF

بس يا سيدى و راحت معيطه ، و دخلت على جوزها قالتله لو مجبتليش غسالة أوتوماتيك أنا هزعل و أروح عند بابا .. و مش هجيلك البيت تانى .. راح جوزها قالها حاضر هجيبلك الخلاط .. بس شرطى الوحيد إنك متفتحيش باب التلاجه كتير علشان ده بيسرب الفريون و هنضطر نجيب بتاع التلاجات يشحنلنا الراديو .. بمناسبة الشحن ممكن تحوليلى 5 جنيه علشان كل ما أحاول أتصل بحد  يقولولى “عفواً لقد نفذ رصيدكم”؟؟

لو فهمت حاجه من الكلام اللى فات ده يبقى إنت ذكى و عبقرى و فاهم المجلس بيعمل إيه ، و وحياة أبوك يا شيخ فهمنا .. ده إحنا غلابه .. عندنا أزمة أمن و رز و سولار و عيش و ثقة .. و معندناش رؤية واضحه ولا خطه باينه ولا ناس بتحاول تفهمنا إيه اللى بيحصل.

أنا فاكر كويس لما نزلنا يوم 28 و الناس كانت بتهتف “واحد .. إتنين .. الجيش المصرى فين” ،  كنت بسأل الناس: هو الجيش لو نزل هيبقى فى صف مين؟ .. و كنت بسكت و مهتفش معاهم ، و كان عندى قناعة إن المؤسسه العسكرية داعمة لمبارك  بشكل كبير.

و طبعاً كلنا سمعنا – و فيه ناس شافت – إن الحرس الجمهورى أول ما نزل كان بينقل زخيرة للشرطه ، وكان بيساعدهم على قمع المتظاهرين. و بعد يوم 28 و الفوضى اللى حصلت و هروب الشرطة – زى الست اللى زعلت من جوزها بسبب الغسالة الأوتوماتيك – الجيش نزل الشارع و “حاول” يعيد الأمن ، لكن للأسف محصلش ، فضل الأنفلات الأمنى و الهيصه فى الشارع.

و بعدين حصلت غزوة الجمال و الحمير و الخرفان على المعتصمين فى ميدان التحرير ، و وقوف أفراد الجيش هناك على الحياد ، و حصلت “المهزلة” و جرح من جرح ، و قتل من قتل ، و مفيش حد إتحرك من القوات اللى هناك علشان تمنع المهزلة دى ، و كلنا سألنا و بنسأل … هو إيه اللى حصل؟؟

وعدت الأيام ، و كلام إتقال و كلام متقالش ، لحد ما وصلنا قبل التنحى بيوم ، كنت فى التحرير و سمعة الظابط شومان و هو بيوجه رسائله اللازعه لمبارك و عمر سليمان و المشير ..الخ ، و حسينا كلنا إن فيه حركه جوه الجيش بتأيد الثوره لكن ما باليد حيله ، و طبعاً اللى عايز يرجع لكلام شومان تقدروا تشوفوا الفيديوهات على يوتيوب ، و تسمعوا نقده لبعض القاده العسكريين.

ساعتها أنا سألت واحد صاحبى كان واقف جنبى: إشمعنا  مبارك هيسلم البلد للمجلس العسكرى ، و ليه مش عايز يخلى رئيس المحكمه الدستورية هو اللى يمسك البلد لمرحلة إنتقاليه؟ .. و برضه مالقيتش إجابه.

و بعدين سمعنا اللوا الفنجرى – الله يباركله – و تحيته لشهداء الثورة ، و قلوبنا إتشرحت و إتفتحت للمجلس العسكرى ، و خلصت مرحلة السعاده المفرطه و بدأنا فى مرحلة القلق المفرط. فضل المجلس متمسك بالوزاره اللى حلفت قدام مبارك ، و قعدنا نسأل: هو مش فى ثورة حصلت؟؟ ، طب شفيق قاعد بيعمل إيه؟؟

المهم الموضوع كان ماشى بالزق ، نحس بأى تباطوء ، نقوم عاملين مليونيه ، يتحقق شويه من اللى إحنا عايزينة ، و جه عصام شرف – الله يباركله – و كنا فى منتهى النشوه الثورية ، بس طلع سؤال تانى نفسنا نفهمه: هو إشمعنا وزير “الإنتاج الحربى” فضل فى الوزارة الجديدة؟؟؟؟؟

و بعدين بقى متعدش ، فظ المظاهرات بالقوة ، إعتقالات ، محاكمات عسكرية ، قانون حظر الأعتصامات و الإضرابات ، تباطوء فى إعادة الأمن للشارع ، حل المشاكل بالمجالس العرفية ، سياسة إعلامية زى زمان بالظبط ، مقابلة بثينة كامل مع اللوا عتمان ، الإرهاب الأقتصادى ،  إطفيح و إمبابة ،تباطؤ فى تنفيذ القانون …….. إلخ

و السؤال الكبير دلوقتى: هو إيه اللى بيحصل؟؟

بس يا سيدى ، راح إشترالها الغسالة الأوتوماتيك و الخلاط و باع التلاجه و شحن بكارت بعشره جنيه ، لكن الغريبه إن برضه لسه بيقولوله “عفواً لقد نفذ رصيدكم”.

2 Comments

Filed under U

2 responses to “يا مجلس يا عسكرى ، لقد هرمنا و ورمنا #NoSCAF

  1. علشان شحن بكارت مش بتاع الخط بتاعه
    ومهما شحن برضوا نفذا رصيدكم يا ريت يغير بقه لخط علشان الكارت قرب يتحرق من الشحن الغلط

  2. Anonymous

    كويس إنه لسة فاكر موضوع الشحن
    إفتكرته هيكتفي بالغسالة والخلاط

    للأسف اللي بيحصل دلوقتي إن المجلس بيعمل
    اللي هو ونظامه عايزينه,
    لكن الثورة ومطالب الثورة
    ثورة إيه يا عم خلي الطابق مستور

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s