آدي يا سيدي موبينيل اللي كنت بدافع عنهم #Egypt @Mobinil

عندي خط موبينيل حصلت مشكله في تجديد باقة الإنترنت عند التجديد .. و المشكله زي ما عرفتها بعد كده انه مكنش فيه رصيد كفايه لتجديد الباقه فا وقِّفُوها من غير ما يبعتولي أي تنبيه إن الباقه مش هتتجدد و إنهم هايحسبوني بالتعريفه العاديه (أول ميجا بـ جنيه و بعد كده الميجا بـ 5 جنيه) .. و طبعا كل ما أشحن أي رصيد يتدمر .. طبعا ماكنتش عارف الحوار ده فا قولت اتصل بـ خدمة العملا .. اتصلت الساعه 6:47 PM  و رد عليه واحد اسمه “سامي كامل” تقريبا .. حاكيتله المشكله و قالي استني اشوف علي السيستم .. و بعدين حكالي القصة بتاعة إن مكنش عندي رصيد كفايه .. قولتله طب كان المفروض السيستم يبعلتي أي تنبيه يحذرني و يقولي كده .. قالي لأ علشان ده سيستم .. أنا كنت منفعل جدا و الولد كمان بدأ ينفعل .. قولتله طب أنا عايز أصعّد الموضوع و أعمل Complaint “شكوي”  قالي ماينفعش .. قولتله يعني إيه ماينفعش أنت مالكش دعوه .. أنت تخليني أبعت شكوتي وبس .. قالي يعني إيه ماليش دعوه أنا بقولك ماينفعش .. قمت قافل السكه في وشه و قولت هسأل أي حد يقولي إزاي أبعت شكوي و حدثت المفاجأة …..

بعد ما قفلت معاه علي طول قعد يتبعتلي سبام رسائل MMS و Push Messages
و موبيلي بقي يخش اوتوماتيك علي الإنترنت  و طبعا عمل كده علشان يخلصلي الرصيد و “يعاقبني”  .. قفلت التليفون مرتين و كل ما افتحه الاقي سيل من السبام و مش عارف حتي أعمل منه أي اتصال. و دلوقتي الساعه 9:53 بحاول أعرف رصيدي بقي كام بيظهرلي رساله بتقولي You are currently susbended. و الساعه 10:42 دقيقه رجعلي تاني السبام.

يعني إيه بني ادم زي ده يكون شغال في شركه كبيره وكمان في خدمة العملا .. و يعني إيه يقولي ماينفعش تبعت شكوي .. و يعني إيه بمنتهي الثقه يبعتلي سبام و هو مش خايف إني اشتكيه .. يعني إيه كنت شغال في لينك دوت نت و أكلم كل صحابي علشان أصعّد الموضوع و معرفش استخدم تليفوني لحد دلوقتي (عدي حوالي 3 ساعات) ..

يعني أنا أكون من الناس اللي ادافع عن موبينيل و اقول بلاش نقاطعها و ماينفعش نوقع شركة مصريه يعملوا فيه أنا كده … أنا حزين جدا والله .. مش حزين علي الكام جنيه اللي ضاعوا مني بسبب الشخص ده … أنا زعلان إن ده يحصل من شركه قعدت ادافع عنهم و اتشتم بسببهم من الناس و اقول معلش أنا بدافع عن شركه مصريه أصحابها مصريين و لازم ماتقعش … بس الظاهر إني كنت غلطان و إن هم نفسهم مش فارق معاهم المصريين اللي بيمصوا دمهم.

و في الآخر الممثل بتاعهم علي تويتر باعتلي بيقولي أكيد ده مش مقصود .. و أكيد برضه اللي حصل ده مش صدفه … و أكيد برضه فيه تفسير للي حصل و ممثل خدمة العملا ده ليه يد في اللي حصل … و تخيلوا إن لحد دلوقتي محدش من موبينيل عايز يقولي أقدم شكوي إزاي … أنا هديهم فرصه 24 ساعه .. لو محستش إني خدت حقي هقدم شكوي في الجهاز القومي لتنظيم الإتصالات 155 .. و الأهم انهم هيخسروا عميل.

______________________________________________________________________________________________

تحديث: 16 نوفمبر 2011

حد من موبينيل كلمنى إمبارح و إعتذرولى و قالولى إنهم عاقبوا الولد و إنهم هيعوضونى عن الرصيد ، أنا قلتلهم أنا دلوقتى عندى مشكلتين كبار و مشكله صغيره ، مشكلة الرصيد و دى المشكله الصغيره ، المشكلتين الكبار أول واحده فيهم إزاى حد فى شركه كبيره زى دى يقرر إنه يبعت سبام لعميل لمجرد إنه شد معاه فى التليفون و يعمل كده بمنتهى الثقه ، و اللى أنا واثق منه إنه أكيد عمل كده أكتر من مره بس المره دى وقع مع الشخص الغلط ، تانى حاجه إزاى موبينيل تقرر إنها تحاسبنى بتعريفه مختلفه من غير ما يبعتولى أى تحذير ، يا راجل ده لما بيبقى رصيدى أقل من جنيه بتبعتوا “من فضلك إشحن رصيدك” ، إيه أم الإزدواجيه دى.

هم قالولى إن بخصوص الولد إتاخد ضده إجراء قاسى و إنه مش هيتعامل مع عملاء تانى أبداَ ، و إنهم هيضمنوا إن اللى حصل مايتكررش مع أى عميل تانى ، بس فشلت إنى أخليهم يقولولى إيه هو الإجراء ده ، بس ده برضه إعتراف ضمنى منهم إن الولد فعلاً هو اللى بعتلى السبام. و قالولى إنهم هيبعتوا الطلب بتاعى علشان يتعمل فى السيستم و يبعت تحذيرات للناس لو هيتحاسبوا بتعريفه مختلفه غير اللى هم متوقعينها ، و قولتلهم أنا هستنى شهر و أشوف ، ولو ماتعملتش ممكن أبدأ فى حمله ضد الشركات التلاته علشان يبقوا أكتر شفافيه مع العملاء و يبطلوا شغل مص الدم.

المهم فى الموضوع ده إن إحنا مانسكتش تانى ، لو أى حد حصل معاه أى حاجه يشارك الناس بيها ، و يعملهم هيصه وزيطه لحد ما ياخد حقه وحق الناس كلها ، أيوه إنت لما بتاخد حقك من شركه غلطت فيك إنت بتاخد حق الناس كلها علشان هم مايكرروش الغلطه دى مع حد تانى.

رساله إلى كل مقدمى الخدمات فى مصر: إمشى عدل يحتار عميلك فيك ….. إحترمونا يرحمكم الله

6 Comments

Filed under U

6 responses to “آدي يا سيدي موبينيل اللي كنت بدافع عنهم #Egypt @Mobinil

  1. Ahmed Osman

    dear My name is Ahmed Osman and I work in Mobinil handling Mobile internet. I just came across this post and i am deeply sorry to hear your story and I hope you can accept my sincere apologies. kindly get n touch with me and i will be more than glad solve your problem and make it up for you. I am posting my personal email. kindly send me your number and i will call you directly

  2. تمام يا معلم هما كده ياخدو بالجزمه يمشو كويس تحترمهم يدلعو

  3. Anonymous

    دى شركه زباله ومعفنه

  4. khaled hassan

    انامشكلتي ان الخط وقف رغم اني مسدد من كام يوم الفواتير وانا اشتراكي شركات ولما اتصلت استفسر قالولي ان المفوض طلب وقف الخطوط قولت لهم انا المفوض وماطلبتش حاجه زي دي وبقالي خمسه ايام اتصل ب250 خدمه عملاء شركات يقولولي ادينا رقم تاني نقدر نكلمك عليه اديتهم 0100 بتاعي ماحدش كلمني الظاهر موظف طمعان في الارقام بتاعتي
    لان رقمي في التلات شبكات نفس الرقم
    السوال دلوقتي بالتاكيد فيه جهه في مصر اقدر اقدم فيها شكوي لاني مش هاستغني عن ارقامي
    وفي نفس الوقت رمضان كريم ومش عايز اروح لهم في الاداره الي علي الكورنيش علشان ماهدش المعبد علي دمغهم في الشهر الكريم وخايف استني بعد رمضان الاقي خطوطي شغاله وحد تاني بيرد علي العملاء بتوعي اعمل ايه

  5. Anonymous

    معاناتي مع شركة موبينيل
    المشكلة تتلخص في التالي
    انا مشترك في باقة ستار كنترول 100
    تتضمن الباقة 1500 دقيقة موبينيل 250 دقيقة باقي الشبكات 100 رسالة 1 جيجا انترنت
    يتم تجديد الباقة تلقائيا يوم 1 من كل شهر
    تم تجديد الباقة شهر نوفمبر الحالي بالفعل يوم 1 وتم استلام الرساله بتجديد الباقة
    ولم يتعدى استخدانمي في هدا اليوم 10 ميجا
    وفي نهاية اليوم تم استلام رسالة اخرى ان الباقة قد نفذت
    اتصلت بخدمة العملاء يوم 2/11/2015 الساعة 8.30 صباحا وقمت بتوضيح المشكلة بالكامل
    وتم تسجيل المشكلة مع ايضاح من ممثل خدمة العملاء انه سوف يتم التواصل معي من خلال القسم المختص في خلال ساعتين
    لم يتم التواصل معي خلال الفترة الموضحة مما اضطرني الى اعادة الاتصال بخدمة العملاء مرة اخرى للاستفسار عن المشكلة
    وتم الرد بانها مشكلة موجودة بالنظام ليدهم وسوف يقومون على حل هذة المشكلة في خلال 48 ساعة
    لم يتم التواصل معي خلال 48 ساعة مطلقا ولم يتم حل المشكلة
    عاودت الاتصال بهم مرة اخرى لمعرفة سبب عدم حل المشكلة وكان الرد بان القسم المختص ما يزال يفحص المشكلة
    قمت بالتوجه يوم 7/11/2015 الى فرع موبينيل الموجود بشارع شبرا لتسجيل الشكوى مرة اخرى
    وافاد مدير الفرع المتواجد بانه سوف يقوم بتصعيد المشلة مرة اخرى للقسم المختص لشرعة الحل
    وتم استلامي رسالة يوم 7/11 مساء تفيد ان المشكلة مازالت تحت الفحص
    قمت بمكالمة خدمة العملاء مرة اخرى يوم 14/11/2015 لمعرفة سبب عدم حل المشكلة طول هذه المدة
    وتم الرد من خلال ممثل خدمة العملاء انه سوف يقوم بتصعيد المشكلة مرة اخرى
    وحينها طلبت منه محادثة المدير المسئول
    تم تحويلي الى الاستاذ مينا جون
    واخبرني انه سوف يقوم بنفسه بمتابعة المشكلة مع الوعد بالحل السريع
    والى الان لم يتم الرد علي بخصوص المشكلة
    مع العلم انني ابلغت المختصانني سوف اقوم بتصعيد المشكلة حتى نتمكن من حلها
    14 يوم ومشكلة سببها النظام الخاص بموبينيل ولم يتم حلها
    وقامت الشركة بابلاغي انه في حالة استخدام باقة الانترنت الان سوف يتم الخصم من الرصيد الموجود مع احتساب الميجا ب .25 قرش
    01220632777
    محمد صلاح شكري

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s