Category Archives: كلمات غير هادفه

كلمات غير هادفه – فوتوشوب

قالك كله فوتوشوب … القناصه فوتوشوب … اللى بيضرب فوتوشوب … و اللى بيسحل فوتوشوب … و اللى بيقتل فوتوشوب .. الداخليه فوتوشوب …

قالك ثوره فوتوشوب … طب و الثوار؟   فوتوشوب … حتى الشهدا فوتوشوب … و الغاز دا كمان فوتو شوب … و الخرطوش برضه فوتوشوب … بتقول مطاطى؟ فوتوشوب … و رصاصنا الحى فوتوشوب … الدم دا كله فوتوشوب …

كل حياتنا فوتوشوب … أكل مسرطن فوتوشوب … تعليم بايظ فوتوشوب … و مفيش صحه؟   فوتوشوب … طب و العباره؟   فوتوشوب … و وابور العيد فوتوشوب … و اللى إتحرقوا فوتوشوب … و اللى غرقوا فوتوشوب … و اللى إنتحروا فوتوشوب … و اللى نهبوا فوتوشوب … و اللى إتنهبوا فتوشوب … كل الفاسدين فوتوشوب … حتى الساكتين فوتوشوب … و   اللى بينطق فوتوشوب … دولة حسنى فوتوشوب …

الحزب الحاكم فوتوشوب … علشان صفوت فوتوشوب … و حماده عز دا فوتوشوب … و ابن مبارك فوتوشوب … واخدينها تكيه فوتوشوب …

شيلنا مبارك هيلاهوب … من غير خدعه و فوتوشوب … قام المجلس البوب …. ركب الثوره م التوب … بالشرعيه الفوتوشوب …

إمضاء واحد فوتوشوب

Leave a comment

Filed under كلمات غير هادفه

كلمات غير هادفه: علاقة الدرجات بالأرقام … و الاسئله الغير متوقعه في امتحانات نصف العام #Egypt

كنت انوي ان أكتب في الكلمات الغير هادفه الثانيه لي عن القوانين و الإجراءات المقترحه لضبط وربط و تحزيم و تنجيم أداء الشبكات الاجتماعيه ، و لكن لاني كسول بطبعي و في التدوين بالذات … لم اكتبها ، و ايضا خشيت علي نفسي من برد التخشيبه ، التي هي حتما بارده جدا في الشتاء.
لكن علي كل حال هذا لا يمنعني من كتابة هذه الإجراءات عاجلا ام اجلا ، علي رأي بلال فضل: إن عشنا و كان لينا نشر.

 

المهم … مش هطول عليكم علشان ماتناموش مني ، احنا برضه في شتا مبيجيش و خريف مابيخلصش و ربيع مابنشوفهوش و صيف مابنروحش فيه مارينا ، و النهارده برضه يوم اجازه و بكره عيد و بعده سبت و بكده يبقي أنا ضحكت عليكم و خليت الاجازه تخلص بسرعه .. هاهاها ، بس متخافوش عندنا اجازه تانيه يوم 25 الشهر ده علشان نحتفل بعيد لأمناء الشرطه ، يا سلام … و نشوف بقي الأقسام معلقه كهارب ، ….. لا .. لا .. مش الكهارب اللي بيكهربوا بيها الناس الوحشين اللي بيقولوا حاجات وحشه تدخل النار و كمان تدخل القسم ……دول بيقولك بيقولوا … استغفر الله العظيم … “يسقط يسقط حس يبارك” .. مش فاهم ليه عايزين يسقطوه و الامتحانات علي الأبواب.

 

طب بمناسبة الامتحانات بقي هخش في الموضوع ، انتم طبعا عارفين إن أنا حدق و فتك و النصاحه مغرقاني و مبعرفش اوديها فين ، لأ … و كمان في نفس ذات الوقت هتلقوني متواضع تواضع الدلافين – علي رأي العيال السيس – المهم برضه مش هطول عليكم علشان المره دي انتم ممكن تقفلوا الصفحه دي و تحلفوا بكل ما هو “مبارك” و “شريف” و “نظيف” و “حبيب” انكم متزروش المدونه دي تاني.

بس يا جماعه اعذروني أنا اتولدت في زمن “خارق” ، فيه كل حاجه بتتحدي الطبيعه ، يعني مثلا دلوقتي في ناس بتعدي التمانين و لسه شعرهم اسود ، اي نعم أنا شعري ابيض و أنا الفرق بيني و بينهم أكتر من خمسين سنه ، بس برضه مش مهم.

و كمان من الخوارق إن احنا لسه عايشين و راضيين و حلوين و شاطرين و هاديين و في نفس ذات الوقت “بيقولوا” علينا متدينين. مش كفايه كده “خوارق”؟ .. ولا عايزين كمان؟.

المره دي بقي هخش في الموضوع على طول قبل ما تشموني و تقولوا الواد ده بيخرف ولا بيهفلط ولا بيهيس ، معلش …… أصلي امبارح حلمت بحاجه كان نفسي من زماااااااان احلم بيها ، كان نفسي احلم بيها علشان انجح و اجيب الدرجات النهائيه ، و طبعا لما اجيب الدرجات النهائيه هبقي محل تقدير و اعجاب الناس و الدوله و بابا و ماما … و اهداء من تيته ام عباس ل عباس و اخواته … و أسمع اغنية الناجح يرفع ايده و أنا و النعمه ما هسيبه.

اطلع بقي بفهم ولا مبفهمش مش مهم ، أعرف ولا معرفش برضه مش مهم ، المهم يا ساده الدرجاااااااات …… مش احنا اتربينا علي كده؟. و بعدين لما كبرنا قالولنا نفس الكلام .. بالأرقام احنا متقدمين .. بالارقام احنا في “عز” … بالأرقام احنا حلوين و “جمال” و مقطقطين … و طلع مصر اللي بنتنفس كل حاجه متخلفه و فاسده فيها إنها من الدول المتقدمه !!!!!!!!! و بالأرقاااااااااااااام يا ساده .. ولا سحر ولا شعوذه.

هو أنا ليه مش عارف اخش في الموضوع الغير هادف و بخش ديما في مواضيع تانيه غير هادفه برضه .. غريبه .. طب أنا مش فاكر الموضوع الأصلي ،،،،،،، أعمل إيه بقي … بتقول إيه؟ …… الله يسمحك … بتشتمني في سرك …. يا راجل أنا بهزر معاك … طيب خلاص أنا افتكرت …. أنا قدرت احصل علي نسخه من امتحانات نصف العام ، أنا محصلتش علي نسخه ولا حاجه أنا حلمت بيهم ، آه … ما هي دي الحاجه اللي كان نفسي احلم بيها من زمان ، هو اينعم الحلم جالي متأخر شويتين بس مش مهم ،المهم إني انقذ بقي الجيل الجديد … أو اوحله … مش عارف بالظبط.
علي كل حال هتلاقوا شوية اسئله تحت … معنديش فكره هي لأنهي “صف” .. بس أنا عارف كويس هي بتتكلم عن أنهي “صنف”.

– سؤال في العربي: اذكر ما الفرق بين صوابع زينب،و صوابع المحشي،و الصوابع الخارجيه.
– سؤال في العربي: الطلبه المتميزين: واحد قال “مصر مستهدفه لانها متقدمه” .. علل.
– سؤال في الأحياء: كما هو معروف يوجد ثلاث أنواع للبشر – رجال .. نساء .. حزب وطني ، اذكر ما تعرفه عن النوع الأخير.
– سؤال في الكيمياء: اذكر اسم الصنف الذي يتعاطاه بعض المسئولين ، و اذكر مواصفات هذا الصنف من حيث اللون و الطعم و التأثير.
– سؤال في الجغرافيا: اين تقع “رأس الأفعي”؟
– سؤال في الرياضيات: اضرب 30 سنه * عدد الكوارث الطبيعيه و الاقتصاديه و الاجتماعيه ..الخ / و اقسمهم علي عدد أفراد الشعب.
– سؤال في الفيزياء: تغير خصائص الكائنات من قوانين الطبيعه .. اذكر اسم كائن لم تتغير خصائصه .. و اذكر ماذا يستخدم لهذا الغرض.
– سؤال في الدين: “حسبي الله و نعم الوكيل” .. كلمها يرددها الشعب المصري في حق من؟
– سؤال في القوميه: اين ذهبت؟
– سؤال في الجبر: ما نهاية من يحكم جبرا؟
– سؤال في التاريخ: من حرر القدس؟ 1. صلاح الدين الأيوبي – 2. حسني الدين الأيوبي – 3. جمال الدين الأيوبي.

و لو عرفت الإجابه خليها في سرك علشان مالقيكش مشرف جنبي 🙂

3 Comments

Filed under U, كلمات غير هادفه, كلام

الأمن و الانظمه الديموكتاتوريه و الشبكات الاجتماعيه – كلمات غير هادفة

الهاجس الأمني

لا يخفي علي أحد ان في بلادنا نعاني من “هاجس” امني عظيم و يتعاظم يوما بعد يوم، و لكن أي نوع من أنواع “الأمن” يا تري!! الانسان بطبيعة الحال يسعي دائما الي الشعور بالأمن و الامان، و للأمن فروع عديدة، هناك الأمن “الغذائي” و الأمن “الاجتماعي” و الأمن “الاقتصادي” و الأمن “المركزي” و هكذا  ….. في بلادي يسعي كل منا في تأمين مايريده من الأمن، هناك من يحالفه الحظ في ان ينال ما يتمنى و هناك من ينال الشهاده.

و في بلادي تتنوع المساعي و الرغبات كما تتنوع الأجهزة “الامنيه”،،، يسعي رجل الشارع الي ان يكون آمن في مأكله و مشربه و مسكنه، و يسعي رجل الأمن اللي تأمين “موكب” الرئيس!!

و هناك ايضا رجل “الانترنت” و هو من يهرب من الواقع أو الي الواقع عن طريق الشبكات الاجتماعيه و التخيلية،،،، و هذا النوع من المواطنين هو نوع جديد على الدولة و على أجهزة الأمن تماما ،،، هذا المواطن يريد “فضاءا” لكي يمارس فيه حريته و انسانيته بعد ما فقدها أثناء ارتياده “مترو” الانفاق (و منهم لله الحراميه) ..

و هذا المواطن صعب ادارته و السيطرة عليه من قبل أجهزة الأمن التي تمسك قبضتها على زمام الأمور و يفتح هو قبضته لكي “يدعي” على من ظلمه، و لكن ما العمل و قد ظهر هذا المواطن عديم الاحساس بالمسئولية و بتكلفة الكهرباء التي يستهلكها أثناء وجوده على هذا الفضاء “اللعين” ، هناك ازمة في الكهرباء و حرية التعبير في بلادي، و لكن الكهرباء تضيء بيت المسئولين و “حرية التعبير” تضيء قبور الشهداء.

من أيام سمعت عن حلقة “مصر النهارده” التي استضافت فيها “منى الشرقاوي” مجموعة من “الخبراء” ليتحدثوا عن الفيسبوك” ، و هو مساحة مستهلكة لاوقات المواطنين و لكهرباء السد العالي ايضا ، و طبعا تحدثوا عن “الخصوصية” التي نحترمها في بلادي إلى اقصي درجه ، فنحن دولة “مؤسسات” و “برلمانات” و “مهرجانات”،، و طبعا موقع ال “الفيسبوك” اللي تبع شركة “جوجار” (متل ما ارتأي المعد أو الخبير) العالميه هو مشكلة مصر و المصريين و لن نشعر بادميتنا إلا بعد ان نغلق حساباتنا على ال “الفيسبوك” و نوجه طاقتنا في تشجيع الاهلي و الزمالك و الاسماعيلي و ريال مدريد.

طبعا انتظر ان يقوم التلفزيون المصري العربي “المستقل” بتحضير حلقه اخري عن هذه “العصفوره” اللعينه المسماه “تويتر” ،،،،، علي الرغم من ان الانظمه “الديموكتاتوريه” تحب “العصافير” ، و لكن هذه العصفوره تخطت كل الحدود و الخطوط “الحمراء”. “العصافير” التي تحبها هذه الانظمه هي المدربه على نقل أخبار المعارضين و المنشقين التي لهم اجنده و نتيجه و كتب “خارجيه” … ايضا يحبون العصافير التي تستخدم لتحويل انتباه الشعب عن ما يحدث ….. “بص العصفوره” !!

ظهر هذا العام مصطلح “الشبكات الاجتماعيه” ، و قد أربك هذا المصطلح العديد من المثقفين و الباحثين و الامنيين ، لم تكن تعرف البلاد مثل هذه الشبكات ، نحن نعرف جميع الشبكات ، من شبكات الكهرباء الي شبكات الدعاره ، و نعرف جيدا كيف نتعامل مع جميع أنواع الشبكة بشكل امني  علمي ممنهج ، و لكن اختلف الجميع في تعريف واضح و ثابت ل “الشبكات الاجتماعيه” ، فكان القرار انه من اجل الحيطه و الحذر سوف يتم تصنيفها علي انها “شبكات دعاره الكترونيه” لحين اشعار اخر و لا عزاء “لمن ينادي”.

أنا اقترح علي الانظمه “الديموكتاتوريه” ان يعملوا علي وضع بعض التشريعات لضبط و تنظيم و تحجيم و تنجيم أداء الشبكات الاجتماعيه – و العياذ بالله

و سوف أبدأ أنا بمجموعه من الاقتراحات في “الكلمات غير الهادفه” القادمه إن شاء الله …..  إن كان في العمر بقيه.

أحمد عبد المنعم
eg.2@hotmail.com

Leave a comment

Filed under كلمات غير هادفه, كلام