كل اللى حصل فى ماريناب ده إشاعه … فيه ناس عايزه تصدق كده #Maspero #Maspiro

 ظهر فيديو على الفيسبوك للأنبا هيدرا بيؤكد فيه إن كل شى بخير فى أسوان و كنيسة الماريناب سليمه و زى الفل ، و اللى بيروج للفيديو ده على الفيسبوك بيستخدمه علشان يثبت إن اللى حصل ده كله بسبب “إشاعه” … و تجاهل كل الصحافه اللى إتكتبت فى الموضوع ده ، و تجاهل كلام محافظ أسوان نفسه على الكثير من الفضائيات اللى أكد فيه الموضوع ، و تجاهل فيديو المستشاره نهى الزينى اللى كانت فى لجنة تقصى الحقائق و اللى رفعت توصيه للمجلس العسكرى بضرورة إقالة محافظ أسوان ، و طبعاً المجلس مش فاضى للكلام ده و نفضلهم.

 من غير تطويل أنا مقدرتش أقتنع بالكلام ده ، و دورت على المقطع بتاع الأنبا هيدرا على يوتيوب علشان اشوف الفيديو ده إترفع إمتى ، لقيته إترفع بتاريخ 20 سبتمبر 2011 ، و دورت على خبر أحداث الماريناب كانت إمتى ، و لقيتها على مواقع كتير بتقول إن الناس هجموا على الكنيسه يوم 30 سبتمبر 2011 (و ده الخبر على بوابة الشروق) … يعنى تقريباً بعد فيديو الأنبا هيدرا بـ 10 أيام.

ناس كتير عايزه تصدق إن اللى حصل ده إشاعه و تنسفه من الأساس علشان تريح نفسها و ماتخدش موقف واضح و صريح ، اللى حصل ده جريمه فى حقنا كلنا ، سوء إداره (و إحتمال سوء نيه) من القائمين على إدارة البلاد.

من أكتر المقالات اللى عجبتنى فى تحليلها للأحداث الأخيره ، مقاله ل عمر طاهر إسمها الإختيار ، كان منصف مع الكل برضه ، رصد سلبيات و كلام تحريضى من رجال دين مسيحيين و مسلميين ، و دور الإعلام الرسمى فى التهييج و الفتنه ، و فشل المجلس العسكرى فى إحتواء الموقف.

و أنا بقى هجاوب على السؤال اللى بيشغل كتير من الناس: مين اللى بدأ أحداث ماسبيرو؟؟

الإجابه هى: معرفش
بس أعرف كويس قوى مين اللى تباطىء و تخاذل فى تحقيق العداله و إحتواء ما حدث فى أسوان ، و أعرف كويس قوى مين سمح لإعلام دوله يحرض الناس على بعض و يطلع المصابين بيشتموا فى المسيحيين ، و أعرف كويس قوى الشيوخ اللى بيحرضوا على الفتنه ، و أعرف كويس قوى القساوسه اللى حرضوا الناس على الفتنه برضه ، و أعرف كويس قوى اللى طلّع المدرعات تجرى ورا الناس زى المخابيل ، و أعرف كويس قوى اللى سكت على فلول الصعيد لما هددوا وحدة الدوله لو إتفعّل قانون الغدر ، و أعرف كويس قوى اللى ماقدمش مجرمين أحداث إمبابه للعداله ، و أعرف كويس قوى اللى مش عايز ينزل الشارع و يشوف شغله و يلم البلطجيه.
أعرف حاجات كتير قوى تخلينى ماسكتش و أقول “أنا مش هقول حاجه إلا لما أعرف مين اللى بدأ” ، إصحوا يا ساده ، خليكوا منصفين ، النهارده المسيحيين ، بكره السلفيين و بعده الأخوان ، لو سكتنا عن اللى بيحصل الدور هيبقى علينا قريب.

لازم نحافظ على سلمية الثورة ، و ماينفعش نسكت و نقعد فى البيت و نسيبهم يعكوا و يلعبوا بينا ، هنكمل ثورتنا فى كل حاجه لحد ما يسقط النظام و نبنى نظام جديد عادل.

الموضوعيه تقتضى أن تكون منصفاً مع الكل.

Advertisements

1 Comment

Filed under فتنه, مسلم, مسيحى

كتاب أرهقني أيام طفولتي: الأدله الماديه علي وجود الله

لما بشم رائحة المسك في المسجد بنشرح قوي و بفتكر أيام الطفوله .. أيام ما كان الواحد ايمانه خالص مش محتاج لأي براهين ولا اثباتات عقليه .. كان حب الله و الإيمان بيه شيء فطري كده .. زي البوصله لما تحطها في أي مكان ابرتها تتجه لمكان بعينه .. فطرة الروح برضه في هذه الأيام كانت تتجه الي الله بدون أي مجهود ذهني أو عقلي …. حب خالص و ايمان نقي.

عارفين أنا أول كتاب اتصدمت فيه كان اسمه  إيه؟ .. كان كتاب اسمه “الأدله الماديه علي وجود الله” للشيخ محمد متولي الشعراوي .. و قعدت كام يوم مانمش بسببه و اسال نفسي .. أدلة إيه دي اللي هنبرهن بيها نحن البشر علي وجود الله .. وكمان أدله ماديه .. لم أستطع أن أفهم لماذا ندرس هذا الكتاب من الأساس .. كيف نستخدم براهين و اثباتات ماديه دنيويه نسبيه لنثبت به وجود المطلق سبحانه و تعالي.

و كانت المفاجأه و الطامه الكبري التي كسرت قلبي الصغير حينها .. مش كل البشر بيؤمنوا بالله .. إزاي ده و ليه و إزاي ربنا ساكت عليهم .. فطرتي و نقائي الطفولي لم يستوعب هذه الحقيقه المره.

في المراحل المبكره من الأفضل التركيز علي الروح و تقوية الشعور الجميل بـ لإيمان بالله .. حاله صوفيه طفوليه .. نركز علي التقوي و الإخاء و كل السلوكيات و الأخلاقيات اللي بينادي بيها الإسلام و يؤمن بيها معظم البشر المسلمين منهم و غير المسلمين .. و التقليل من التركيز علي العقل اللي ممكن يشوه الفطره الجميله اللي بتكون في السن ده.

الكتاب ده مش قادر أنساه لأنه “أرهقني” ..  يعني وجود الشجر دليل علي وجود الله . الشيخ الشعراوي كتب الكتاب ده علشان كان خايف من موجات الإلحاد اللي كانت موجوده و بدأت تنتشر وقت تأليفه هذا الكتاب و كان بيحاربها بكل شكل .. بس ده مش للأطفال اللي هم اصلا مش محتاجين براهين و أدله و مؤمنين بالله بشكل فطري.  و نبقي ندرس كل الفلسفات دي و الأدلة و كل حاجه في مراحل متأخره شويه من التعليم .. يعني مش قبل ثانوي مثلا.

ياريت نقوي الحاله الصوفيه دي في الأطفال و نخليهم يحبوا ربنا الرحمن الرحيم العدل .. الذي لا يغفل ولا ينام .. الذي يرعي عباده و يصبر عليهم .. يا الله .. لا أتمني اكثر من أعود بفطرتي لأيام الطفوله ..

Leave a comment

Filed under أسلاميات, تربيه, ذكريات و خواطر

كلمات غير هادفه – فوتوشوب

قالك كله فوتوشوب … القناصه فوتوشوب … اللى بيضرب فوتوشوب … و اللى بيسحل فوتوشوب … و اللى بيقتل فوتوشوب .. الداخليه فوتوشوب …

قالك ثوره فوتوشوب … طب و الثوار؟   فوتوشوب … حتى الشهدا فوتوشوب … و الغاز دا كمان فوتو شوب … و الخرطوش برضه فوتوشوب … بتقول مطاطى؟ فوتوشوب … و رصاصنا الحى فوتوشوب … الدم دا كله فوتوشوب …

كل حياتنا فوتوشوب … أكل مسرطن فوتوشوب … تعليم بايظ فوتوشوب … و مفيش صحه؟   فوتوشوب … طب و العباره؟   فوتوشوب … و وابور العيد فوتوشوب … و اللى إتحرقوا فوتوشوب … و اللى غرقوا فوتوشوب … و اللى إنتحروا فوتوشوب … و اللى نهبوا فوتوشوب … و اللى إتنهبوا فتوشوب … كل الفاسدين فوتوشوب … حتى الساكتين فوتوشوب … و   اللى بينطق فوتوشوب … دولة حسنى فوتوشوب …

الحزب الحاكم فوتوشوب … علشان صفوت فوتوشوب … و حماده عز دا فوتوشوب … و ابن مبارك فوتوشوب … واخدينها تكيه فوتوشوب …

شيلنا مبارك هيلاهوب … من غير خدعه و فوتوشوب … قام المجلس البوب …. ركب الثوره م التوب … بالشرعيه الفوتوشوب …

إمضاء واحد فوتوشوب

Leave a comment

Filed under كلمات غير هادفه

حقنة الهوا … و من يضع حجر الأساس … و منك لله يا سكاف

أكتر كلمه بقيت أكرهها فى حياتى هى: الإستـــــفـــــتــــاء

طبعاً إنتوا عارفين ليه ، الإستفتاء هو أول حقنة هوا تتضرب فى الجسد الثائر. و شوفوا نتيجته كانت إيه: تشتت و تشرذم و خناقه على من يضع حجر الأساس فى الدوله اللى عايزينها.

ثورة يعنى دستور جديد ، كل الناس بتقول كده و مؤمنه بده ، ثورة قامت علشان الممارسات الفاسده اللى كان بيقوم بيها رئيس جمهورية متعالى مغرور لا يسمع إلا نفسه ولا يرى إلا نفسه ، نقوم إحنا إيه بقى نسمع كلامه و نعدل كام ماده و نعمل إستفتاء عليهم. و يبدأ صداع الإنتخابات أولاً ولا الدستور أولاً. و إتحول الوضع إلى صراع “وهمى” حول هوية الدوله و المادة التانيه ولا حول ولا قوة إلا بالله.

بدل ما نستغل الحاله الثورية و الإتفاق اللى كان بين الجميع قبل الإستفتاء و نشوف آليه لإنتخاب ممثلين من كافة التيارات و القوى و الإتجاهات علشان نحط دستور جديد لدوله كلنا بنحلم بيها و نحط “حجر الأساس” ، نقوم نعمل إستفتاء وهمى يخلق الحاله دى و نفضل لحد دلوقتى فى صراع على مجلس الشعب ، و فى الأساس الخناقه دى علشان المجلس هو اللى هيختار من هيكتب الدستور …  مين هيحط حجر الأساس.

اللى حصل حصل ، و مش عادتى إنى أقول “لو كان حصل” كتير ، بس حقنة الهوا مش عايزه تخرج من دماغى ، عايزين نتوحد تانى ، عايزين نتفق و نتفهم التخوفات و نفهم بعض و نختلف بإحترام و نراعى المصلحه المشتركه ، عايزين نرجع للحاله اللى كنا عليها قبل الإستفتاء.

توحدوا يرحمكم الله

أحمد عبد المنعم
18 سبتمبر 2011

Leave a comment

Filed under فتنه, سياسة

Review: طبائع الاستبداد ومصارع الاستعباد

طبائع الاستبداد ومصارع الاستعبادطبائع الاستبداد ومصارع الاستعباد by عبد الرحمن الكواكبيMy rating: 4 of 5 stars

اللعنه على الإستبداد.

أتفق مع عبدالرحمن الكواكبى أن آفة العرب هى الإستبداد ، و الإستبداد أصل كل مرض أصاب العرب و المسلمون منذ زمن طويل.

الإستبداد يخلق إنسان خامل مشوش لا يهتم بالعمل للآخره، بل كل ما يهمه هو “هنا” و “الأن”. يخلق إنسان لايهتم إلا بالملذات الحسيه و بكل ما هو مادى ، خشيته من الحاكم – لإنه هنا و الأن – أكبر من خشيته من الله ، يفضل قراءة الأورده و التسابيح التى يعتقد أنها تزيد من رزقه على أن يقرأ القرآن ويتدبره ، يحول الدين من منهج حياه و إقامه للعدل و رفض الظلم و إعلاء الحق إلى طقوس تحولت إلى عادات ، و أورده و تسابيح يحرك بها شفاهه دون فهم و تفكر و تدبير.

الإستبداد يؤثر فى جميع جوانب و أنشطة الدوله بالسلب ، فهو يخلق الشيخ الذى يمجد السلطان و يخشى أن يقول قولة حق ، و يخلق النخبوى المنفصل عن أرض الواقع و يحاول أن يرضى طبقه معينه و أعوان الحاكم ، و يخلق رجل الأعمال الذى لا يهتم بباقى الشعب و يعمل فقط على إرضاء نفسه و الحاكم و أعوانه و لو بإمتصاص دماء الشعوب.

لن نتخلص من الإستبداد إلا برفع الوعى لدى الناس و تنمية إدراكهم بالظلم الواقع مما قد يؤدى إلى تقبيحه فى نفوسهم ، و هذه هى الخطوه الأولى. التخلص من الإستبداد ليس بالأمر السهل و الهين ، و يحتاج إلى الجهد و الإخلاص و المثابره و قبل كل ذلك إنكار الذات ، و وضع مصلحة الناس قبل أى مصلحه شخصيه و مجد شخصى.

كتاب رائع و ثورى من الطراز الأول ، يشعل بداخلك ثوره عارمه لرفض أى ظلم و خمول و تكاسل و ديكتاتوريه ، على الرغم من أن عمر هذا الكتاب أكثر من 100 عام ، إلا أنه كما لو كان الكاتب يعيش بيننا الأن و يوصف ما فعله الإستبداد بنا و بأمتنا.

لم يعجبنى بعض النقاط فى هذا الكتاب و لكن أعتقد أنها لا تذكر إذا ما قورنت بالإفاده منه ، و بعضاً من هذه النقاط ما يلى:

– ذكر الكاتب ص 123: ولهذا يكون العضو الذي لا يصلح لوظيفة، أو لا يقوم بما يصلح له، حقيراً مهاناً. وكلُّ من يريد أن يعيش كَلاًّ على غيره، لا عن عجزٍ طبيعيٍّ، يستحقُّ الموت لا الشفق.

أعتقد أن هذه مبالغه فى رفض العضو الخامل ، هذه الجمله بها لمسه من النيتشويه ، و بسبب هذا المبدأ أعدم هتلر كل عضو غير منتج سواء كان بسبب عجز أو غيره.

– ذكر الكاتب فى ص 120: أيها الوطن الحنون : كون الله عناصر اجسامنا منك ، وجعل الأمهات حواضن ؛ ورزقنا الغذاء منك ، وجعل المرضعات مجهزات ، نعم ، خلقنا الله منك ، فحق لك أن تحب أجزاءك وان تحن على افلاذك . كما يحق لك في شرع الطبيعة أن لاتحب الأجنبي الذي يأبى طبعه حبك ، الذي يؤذيك ولا يواليك ، ويزاحم بنيك عليك ويشاركهم فيك ؛ وينقل الى ارضه في جوفك من نفيس العناصر وكنوز المعادن فيفقرك ليغني وطنه ، ولالوم عليه بل بارك الله فيه “.

أعتقد أنه غير موفق فى أخر جمله “ولالوم عليه بل بارك الله فيه” ، أيضاً هذه الجمله بها بعض النيتشويه و ترسيخ لمبدأ “البقاء للأقوى” ، القوه مطلوبه و لكن لابد أن تقترن برحمه. و ما فعله الغرب بنا هو إغتصاب و مص دماء الشعوب ، ولا يمكن أن يرضى الله على مغتصب الحقوق الذى يعثى فى الأرض فسادا و نهباً.

و أختم بهذه المقوله لعبدالرحمن الكواكبى: اللهم ان المستبدين وشركاءهم قد جعلو دينك غير الدين الذى أنزلت فلا حول ولا قوة إلا بك !

أحمد عبدالمنعم
15 سبتمبر 2011

View all my reviews

Leave a comment

Filed under Books

من أجل مصلحة المريض

كان يا ما كان مريضاً بالسرطان يعلم أن سكوته على الورم معناه الموت المحقق ، و على الرغم من إدراكه لكل الآثار الجانبيه لعلاج هذا الورم و إستئصاله ، آثر أن يأخذ طريق العلاج و إزالة الورم و تحمل العواقب على أن يسكت و يموت بسبب هذا الورم الخبيث الذى انتشر فى جسمه بلا رحمه ولا هواده.

و لأن هذا المريض بدأ يتحرك فى الوقت المناسب قبل أن ينال الورم منه فقد لاحت بوادر الشفاء ، و بدأ الورم فى التقلص و التشتت ، و لكن بقى منه “القليل” يأبى أن يغادر فى سلام. و بعد تماثل هذا المريض إلى الشفاء و تحسنت حالته بشكل ملحوظ بدأت تظهر الآثار الجانبيه للعلاج ، أمراض كثيره أصيب بها و يحتاج إلى وقت علاج إضافى ، و لإن الأنسان كان ذهوقاً و أكثر شيء جدلاً فقد ظهرت بوادر إنشقاق بين عائلة هذا المريض:

* الفريق الأول يرى أنه يجب أن يستمر المريض فى العلاج و ألا ينسوا ما تبقى من “السرطان” حتى يشفى تماماً ، و بدأوا فى شراء المزيد من الأدويه.
* و الفريق الثانى رأى أن المريض يجب أن يفكر فى مستقبله و أن يخطط له و لا ينتظر الشفاء التام لأن هذا يحتاج إلى وقت كبير. و بدأوا فى التخطيط لمستقبله و شراء ملابس جديده له و بعض المستلزمات التى “سيحتاج” إليها بعد الشفاء التام.
* الفريق الثالث و لأن صبرهم قد نفذ و تم تجاهلهم من أول فريقين “تمنوا” أن يعود السرطان إلى جسد المريض ، و ليحدث ما يحدث.

و طبعاً للشفاء التام يجب أن يهتم الفريق الأول بالأدويه و الفريق الثانى بالمستقبل ، و الأهم أن يوضحوا للفريق الثالث دون إحتقار أو نظره دونيه برؤيتهم لعلاج هذا المريض.

عليهم ألا يختلفوا و يتركوا المريض يموت ، على كل فريق أن يقدم ما يستطيع من أجل إنقاذه ، على الجميع الوقوف معاً لإستئصال ما تبقى من الورم ، على الجميع التفكير فى مستقبله حتى يقف على قدميه ، على الجميع تقدير ما يفعله الفريق الآخر دون مزايده و دون تجريح أو تسفيه أو إقصاء …… من أجل مصلحة المريض.

أحمد عبد المنعم
القاهره 22 أغسطس 2011

Leave a comment

Filed under كلام, توعيه سياسيه, خليك ايجابي

فكره بسيطه للتوعيه السياسيه

يوم الجمعه و الأحد ناس كتير بتكون موجوده في الجوامع و الكنايس علشان يصلوا .. و احنا متعودين و احنا خارجين بيبقي فيه ناس بتوزع ورق للدعايه ، سواء دعايه لمدارس ولا مكوجي ولا مرشح مجلس شعب … ألخ

طب ليه مانستخدمش نفس التكنيك في توزيع منشورات تتضمن بعض التعريفات السياسيه و الإقتصاديه بإسلوب سهل و جذاب بهدف التوعيه؟؟ ، أعتقد إنها هتكون وسيله فعاله نوصل بيها للناس في الشارع بتكلفه بسيطه ، و ممكن نوزع علي الناس في المترو و المواصلات العامه و المنتزهات و القهاوي و كل حته في مصر ، نفسي حد يتبني الفكره دي و نعملها و ننهض بمستوي وعي الشارع المصري بدل ما نسيبه فريسه للي بيفهمه إن العلمانيه كفر و اللبراليه يعني أمك تقلع الحجاب و الإشتراكيه يعني تقعد في شقه الحمام بتاعها شرك و سلفيين يعني آكلين ودان البشر و الإخوان يعني الأخوان رايت.

و بالمناسبه برضوا فيه مبادرة “تويت شارع” بدأت من فتره و هي أول مبادرة تحاول تخترق فقاعة تويتر اللي عايشين فيها و تنزل بالأفكار و التوعيه للشارع ، محتاجين مبادرات كتير زي دي ، محتاجين ثورة توعيه و مبادرات و مشاريع ، محتاجين نسترجع روح يناير و أكتوبر و كل اللحظات اللي الشعب ده انتصر فيها علي الظلام و الظلم و الجهل  ، و هدم أصنام الفساد و الإستبداد ، محتاجين نتفائل و نبشر بعض بالخير ، و علي رأي وائل خليل “التفاؤل فعل ثوري”.

2 Comments

Filed under كلام, توعيه سياسيه, خليك ايجابي, سياسة