ختان العقول .. و السبيل لإنتاج أفكار

للأسف نشأنا في مجتمع لا يقدر قيمة الأفكار الجديده و يعتبرها نوع من أنواع العبث ، يعني أنت يا عيل يا صغير بتفكر و احنا الكبار لأ ، طبعا ميصحش .. و انت في المدرسه تيجي تسأل المدرس علي حاجه يهاجمك بشده .. هو أنت هتعدل علي منهج الوزاره .. و بعدين إنت لسه عيل صغير متفهمش حاجه ..
و لو سألت اسئله كتير يبقي أنت لمض و مش عايز تفهم .. و لو عندك رأي أو نقد لأداء المدرس أو المناهج .. يبقي أنت عيل قليل الأدب و متربتش.
و طبعا ده انتج ختان عقلي .. عقول من الممكن ان تعمل بكفاءه عاليه .. لكن دون ان تنتج أفكار .. أو إنتاج شحيح و نادر …

و أنت صغير يجيلك إحساس إن الكبار دول فاكرين نفسهم اتولدوا كبار كده و عمرهم ما كانوا صغيرين .. و تلف الأيام و تدور الأيام و نبقي احنا الكبار .. و نبقي مطالبين إن احنا منقعش في نفس غلط الكبار .. لازم نشجع الصغيرين .. و كمان نحرر عقولنا من عملية التشوية و البتر اللي اتعرضت ليهم.

أعراض الختان ده بتظهر قوي لما تجيلك فكره جديده .. و قبل ما تديها حقها في التفكير تلاقي اوهام و وساوس كتير نطط في دماغك:

– هو يعني معقوله البشريه كلها محدش فيهم فكر في الفكره دي قبل كده.
– و بعدين أنت يعني هتعمل إيه جديد.
– طب معقوله اصلا الناس هتسمع الفكره دي .. اكيد هيقولوا عليها ملهاش لازمه و عبيط اللي فكر فيها.
– انسى .. كان غيرك اشطر.
و حاجات كتير أكيد بتختلف من عقل ل عقل

طبعا غيرك ممكن يبقي اشطر لو أنت استسلمت للأوهام دي و هو فكر فيها و فندها و بدأ ينزلها الي أرض الواقع ..

لازم تعرف إن دي أوهام و وساوس لا محل لها من الإعراب .. ماهو أكيد فيه احتمال كبير يكون فيه حد فكر نفس فكرتك قبل كده .. بس مين قال إنه عملها .. و مين قال إنك هتعملها زيه .. و مين قال إن الظروف المحيطه بيه زي المحيطه بيك .. القصد إنك متحاولش تقارن نفسك بمجهول .. و لو بتقارن نفسك بـ معلوم .. قارن بـ موضوعيه من غير ما تجلد ذاتك و تفخم من الاخرين أو العكس.

طيب .. نعمل إيه بقي علشان نرجع الحته المختونه دي و ندور “عجلة إنتاج” الأفكار – ياادي عجلة الإنتاج اللي بتنطلنا في كل حته – ما علينا .. عقلي المختون بيقول إن احنا المفروض نعمل ما يلي:

– القراءه … القراءه … القراءه … القراءه … القراءه … القراءه … القراءه … القراءه … القراءه … القراءه … القراءه … القراءه … القراءه.
– نشجع الآخرين علي إنتاج الافكار .. التشجيع بيحفزك أنت شخصيا علي الإنتاج.
– نهتم بتاريخ الأفكار .. كيف بدأت و الي أين انتهت .. و الظروف المحيطه بنشأتها .. ألخ
– نحيط انفسنا بالأفكار الجديده .. كل ما نشوف فكره جديده افهمها و استوعبها.
– اسمع فكره جديده كل يوم من علي www.TED.com
– نناقش الأفكار اللي عجبتنا مع أصحابها .. و كمان مع الناس اللي نعرفهم.
– منفوتش فرصة لحضور أي حدث سيتم مناقشة فيه فكره جديده.

أعتقد ان الإقتراحات اللي فوق دي ممكن تلهمك اقتراحات تانيه أهم منها .. المهم نحط الموضوع ضمن أولوياتنا ..

و استمتع يا عم بقي بـ سيل من الأفكار .. و الأفكار دي مش لازم يكون كلها جديد .. ممكن تكون تطوير لأفكار موجوده .. أو خليط من أفكار موجوده .. و هكذا ..

طيب المهم بقي … هنعمل إيه بالافكار دي؟

– نكتبها علي جنب.
– نفكر فيها في وقت نكون مستعدين نفسيا. يعني تبعد عن الأوقات اللي أنت متعكنن فيها أو متضايق أو هتطق أو هتنفجر 🙂
– نناقشها مع أصحابنا .. و نهتم بتعليقاتهم.
– نعمل لنفسنا “بنك أفكار” .. نكتب فيه كل الأفكار اللي بتجيلنا .. مش لازم ننفذها كلها دلوقتي .. بس وجودها عندنا في مكان هيساعدنا كل شويه نرجعلها و نفكر فيها أكتر لحد ما تتبلور الفكره و تستوي و تستعد للقطف ..
– و بعدين نشوف احنا محتاجين إيه علشان نطبق الفكره دي .. و اسأل المساعده من أي شخص أنت شايف انه هيقدر يساعدك .. و خليك صريح معاه و وضحله الفكره كويس و العائد بتاعها ( العائد مش لازم يكون مادي )

و في النهايه لا تيأس إذا لم توفق في البدء أو لم توفق في إنجاح الفكره .. قيم ادائك و استخلص الدروس المستفاده و ابدأ من جديد .. و تذكر دائما ان:

“علينا ان نسعي و ليس علينا ادراك النجاح”