بعض الأسئلة عن حرق المجمع العلمي (اللي أول مره أسمع عنه) #NOSCAF

زعلنا كلنا علي حرق المجمع العلمي لما يحتويه من كتب ووثائق تاريخيه .. بس زعلنا أكتر علي الدم اللي سال …. زعلنا أكتر وأكتر من السلطه اللي مستعده تحرق البلد واللي فيها مقابل مصالحها الضيقه … علي كل حال أهو اتحرق واللي كان كان .. بس عايزين نسأل شوية اسئله يمكن نفهم مين حرقه:

* إزاي خبر حرق المجمع العلمي يتنشر قبلها بيوم علي قناة الفلول سي بي سي (اللي بتدس السم في العسل بقيادة لميس الحديدي وخيري رمضان)؟  الفيديو هنا 

* مين اللي كانوا فوق المبني وهو بيتحرق وبيحدفوا علي المتظاهرين طوب وازايز ومين اللي طلعهم؟

* أقرب نقطة اطفاء للمجمع علي بعد 100 متر .. مين مسئول إن المطافي ماتتحركش الا لما الحريق تجهز علي المبني باللي فيه؟

* لما مجلس الشعب اتحرق طلعت طائرات هليوكبتر تطفي الحريق … ليه المجمع اتساب كل الفتره دي؟

* إزاي عناصر التأمين تحمي المباني الفاضيه (مجلس الوزرا ومجلس الشعب ومجلس الشوري) وتسيب مبني زي المجمع العملي بدون أي حمايه؟

* بشهادة أمين المجمع الشباب (اللي كان بيحاربهم عناصر التأمين وبيرموا عليهم طوب) ساعدوا في اطفاء الحريق وكانوا بيرموا نفسهم في النار علشان ينقذوا الكتب .. إزاي بيخربوا المؤسسات وبينقذوا الكتب؟ الفيديو هنا

* ليه بعد حرق المجمع كل الإعلام الفلولي (الفراعين و سي بي سي و كل قنوات ماسبيرو) بيتكلموا “بس” عن الخسائر الماديه ويهمشوا قضية قتل الثوار وسحلهم؟

* ليه قطاع الأخبار ينبه علي المذيعين في ماسبيرو يتكلموا عن الخسائر الماديه بس؟ .. ودي شهادة نرمين البنبي (مذيعه في راديو مصر) علي تويتر

* اخر سؤال: مين اللي صور الفيديو اللي في الرساله رقم 90  لو هو تبع الإعلام العسكري أو التحريات العسكريه اللي تبع المخابرات الحربيه … يبقي أكيد كان فيه عناصر من المخابرات وسط المتظاهرين … هل المخابرات ماكنتش هتعرف تمنع حرق المجمع؟

حاول تجاوب علي الأسئله دي وفكر فيها بمنتهي الهدوء .. شوف مين من مصلحته ابقاء الوضع مشتعل … شوف مين اللي فشل في ادارة البلد … شوف مين اللي كرّه الناس في الثورة … شوف مين بيدعم توفيق عكاشه والحشد اللي بيعمله في العباسيه … هو بتوع العباسيه هتفوا امبارح لمبارك ليه؟ … مين اللي أشاد بأداء الإعلام المصري بعد احداث ماسبيرو علي رغم تحريضه الصريح ضد المسيحيين في مصر ….. مين اللي بيزرع الفتنه وسطينا؟

اللهم أرنا الحق حقا وارزقنا اتباعه … وأرنا الباطل باطل وارزقنا اجتنابه.

الإشتراكيين الثوريين والإخوان .. عشرة كفاح .. وفي الآخر بلاغ

قبل ما هتكلم في أي حاجه .. ده الفيديو اللي بسببه قامت الدنيا ومقعدتش علي الإشتراكيين الثوريين:

بس يا سيدي .. أول ما  الفيديو ده انتشر قامت حرب شعواء علي الإشتراكيين الثوريين .. أنا مش اشتراكي تنظيميا ولكن “اميل” الي الفكر الإشتراكي .. ومعظم الشباب الإشتراكي اللي عرفتهم وطنين جدا ومخلصين بجد للبلد دي .. اختلف معاهم في حاجات كتير .. لكن ماشكتش في لحظه في ولائهم ولا حبهم للوطن وخصوصا فقرائه وكادحيه.

أنا مختلف تماما مع الرفاق في استخدامهم مصطلحات زي “اسقاط الدوله”  .. “انشقاقات الجيش” .. “هدم المؤسسه العسكريه التي تدافع عن مصالح الرأسماليين” .. “مازال هناك دم لابد ان يدفع” .. بغض النظر عن اختلافي مع بعض الأفكار .. ادرك ان المعني من اسقاط الدوله هو اسقاط دولة الفساد وبناء مؤسسات أكثر عدلا .. بس خانهم التوفيق في التوقيت تماما … العسكر نجحوا يكرهوا الناس في الثورة .. و المصريين بطبيعتهم فلاحين .. يعني يدفعوا الدم علشان الأرض والشرف .. بس أي حاجه تانيه ممكن يستنوا عليها وتيجي بالتدريج … المصريين اصلاحيين بالفطره. يبقي الكلام ده هيخسّر أكتر ما هيكسّب .. هيساعد المستبدين أكتر ماهيساعدنا .. وده اللي حصل  وتم الترويج للكلام ده اعلاميا لتشويه الثورة والثوار.

 وبعدين حصل اغرب حاجه ممكن اتخيلها .. لقيت د.جمال تاج الدين عضو في جماعة الإخوان مقدم بلاغ في  ثلاثه من الإشتراكيين الثوريين  (منهم سامح نجيب المتحدث في المقطع السابق) .. مفاجأه بالنسبالي علشان كنت متخيل إن الخطوه دي هيعملها العسكر .. مش الإخوان … وبعدين شوفت الصفحه الأولي  لجريدة “الحريه والعداله” الجريده الرسميه لحزب الحريه والعداله الذراع السياسي لجماعة الإخوان المسلمين:

عنوان الجريده معناه إن الإخوان باعوا الإشتراكيين الثوريين وبعقل واعي بيفتتوا القوي الثورية قدام العسكر .. وبغض النظر عن البلاغ هم أصدروا الحكم وبينفذوه .. ومن الطريف إن أكتر ناس كانوا بيدعموا الإخوان ضد المحاكمات العسكريه لأعضائها أيام العصر البائد هم الإشتراكيين الثوريين .. ولكن كان موقف الدكتور البلتاجي القيادي بحزب الحريه والعداله وجماعة الإخوان المسلمين  مشرف وأصدر هذا البيان علي صفحته علي الفيسبوك:

الفكر يواجه بالفكر وليس ببلاغات النيابة ولا بمحاكم التفتيش. والاختلاف بين شركاء النضال السياسي يجب ألا يتحول لعداوة وخصومة. أختلف شكلا وموضوعا مع أطروحة تفكيك المؤسسات التي يتبناها البعض وأرى أن التطهير الذي لا يزال شعارا للثورة هو الصحيح. أختلف كثيرا مع أفكار سامح نجيب وكمال خليل لكني أقدر نضالهم الوطني لسنين طويلة شاركنا فيها معا . نحتاج لحوار ونقاش يفيد الوطن وليس لإتهامات ومعارك تمزق الوطن ~ محمد البلتاجي

من الواضح إن احنا هنقابل مفاجآت كتير لم نكن نتوقعها .. لكني أتمني ان يعود الكل لرشدهم ويصطفوا خلف الثورة ومطالبها واستيعاب الكتله الثورية الحرجه من أجل الخروج من هذا المأزق.

من أجل مصلحة المريض

كان يا ما كان مريضاً بالسرطان يعلم أن سكوته على الورم معناه الموت المحقق ، و على الرغم من إدراكه لكل الآثار الجانبيه لعلاج هذا الورم و إستئصاله ، آثر أن يأخذ طريق العلاج و إزالة الورم و تحمل العواقب على أن يسكت و يموت بسبب هذا الورم الخبيث الذى انتشر فى جسمه بلا رحمه ولا هواده.

و لأن هذا المريض بدأ يتحرك فى الوقت المناسب قبل أن ينال الورم منه فقد لاحت بوادر الشفاء ، و بدأ الورم فى التقلص و التشتت ، و لكن بقى منه “القليل” يأبى أن يغادر فى سلام. و بعد تماثل هذا المريض إلى الشفاء و تحسنت حالته بشكل ملحوظ بدأت تظهر الآثار الجانبيه للعلاج ، أمراض كثيره أصيب بها و يحتاج إلى وقت علاج إضافى ، و لإن الأنسان كان ذهوقاً و أكثر شيء جدلاً فقد ظهرت بوادر إنشقاق بين عائلة هذا المريض:

* الفريق الأول يرى أنه يجب أن يستمر المريض فى العلاج و ألا ينسوا ما تبقى من “السرطان” حتى يشفى تماماً ، و بدأوا فى شراء المزيد من الأدويه.
* و الفريق الثانى رأى أن المريض يجب أن يفكر فى مستقبله و أن يخطط له و لا ينتظر الشفاء التام لأن هذا يحتاج إلى وقت كبير. و بدأوا فى التخطيط لمستقبله و شراء ملابس جديده له و بعض المستلزمات التى “سيحتاج” إليها بعد الشفاء التام.
* الفريق الثالث و لأن صبرهم قد نفذ و تم تجاهلهم من أول فريقين “تمنوا” أن يعود السرطان إلى جسد المريض ، و ليحدث ما يحدث.

و طبعاً للشفاء التام يجب أن يهتم الفريق الأول بالأدويه و الفريق الثانى بالمستقبل ، و الأهم أن يوضحوا للفريق الثالث دون إحتقار أو نظره دونيه برؤيتهم لعلاج هذا المريض.

عليهم ألا يختلفوا و يتركوا المريض يموت ، على كل فريق أن يقدم ما يستطيع من أجل إنقاذه ، على الجميع الوقوف معاً لإستئصال ما تبقى من الورم ، على الجميع التفكير فى مستقبله حتى يقف على قدميه ، على الجميع تقدير ما يفعله الفريق الآخر دون مزايده و دون تجريح أو تسفيه أو إقصاء …… من أجل مصلحة المريض.

أحمد عبد المنعم
القاهره 22 أغسطس 2011

فكره بسيطه للتوعيه السياسيه

يوم الجمعه و الأحد ناس كتير بتكون موجوده في الجوامع و الكنايس علشان يصلوا .. و احنا متعودين و احنا خارجين بيبقي فيه ناس بتوزع ورق للدعايه ، سواء دعايه لمدارس ولا مكوجي ولا مرشح مجلس شعب … ألخ

طب ليه مانستخدمش نفس التكنيك في توزيع منشورات تتضمن بعض التعريفات السياسيه و الإقتصاديه بإسلوب سهل و جذاب بهدف التوعيه؟؟ ، أعتقد إنها هتكون وسيله فعاله نوصل بيها للناس في الشارع بتكلفه بسيطه ، و ممكن نوزع علي الناس في المترو و المواصلات العامه و المنتزهات و القهاوي و كل حته في مصر ، نفسي حد يتبني الفكره دي و نعملها و ننهض بمستوي وعي الشارع المصري بدل ما نسيبه فريسه للي بيفهمه إن العلمانيه كفر و اللبراليه يعني أمك تقلع الحجاب و الإشتراكيه يعني تقعد في شقه الحمام بتاعها شرك و سلفيين يعني آكلين ودان البشر و الإخوان يعني الأخوان رايت.

و بالمناسبه برضوا فيه مبادرة “تويت شارع” بدأت من فتره و هي أول مبادرة تحاول تخترق فقاعة تويتر اللي عايشين فيها و تنزل بالأفكار و التوعيه للشارع ، محتاجين مبادرات كتير زي دي ، محتاجين ثورة توعيه و مبادرات و مشاريع ، محتاجين نسترجع روح يناير و أكتوبر و كل اللحظات اللي الشعب ده انتصر فيها علي الظلام و الظلم و الجهل  ، و هدم أصنام الفساد و الإستبداد ، محتاجين نتفائل و نبشر بعض بالخير ، و علي رأي وائل خليل “التفاؤل فعل ثوري”.

من الأخر يا ساده: عداله بطيئه يعنى ظلم على ظلم للمظلوم ، و نصره للظالم. #Jun28

سمعت إمبارح عن  شباب متجهين لوزارة الداخلية و عايزين يحدفوا طوب عليها ، مفهمتش ده ليه و فين و بتاع إيه و الناس دى تبع مين ،و لمل الأسئله كترت و مفهمتش إيه اللى بيحصل ، دخلت نمت.

صحيت الصبح و فتحت تويتر لقيت الجو عامل زى يناير و فبراير ، الثوار مشحونين ، و الكلام عن تصادمات مع الشرطه و فيه مصابين و كلام كتير مفهمتش برضه إيه اللى حصل ، قررت إنى أنزل الميدان و أحاول أفهم إيه اللى بيحصل ، و قد كان.

لما نزلت محطة التحرير و مشيت شويه ناحية مخرج طلعت حرب شفت أول مصاب أصحابه مسندينه و مدخلينه محطة المترو ، و بعدين شميت ريحة غاز – مش قويه قوى – بس كانت واصله للمترو من تحت. طلعت فوق لقيت فيه مظاهره صغيره و هتافات ضد النظام ،  و جنب هارديز لقيت فيه مصابين كتير و فيه مستشفى ميدانى، و معظم اللى قاعدين ماسكين فوارغ قنابل مسيله للدموع و قنابل غاز أشكال و ألوان.

سألت الناس عن اللى حصل إمبارح و قالولى إن كان فيه إعتصام لأهالى الشهداء عند ماسبيرو ، و فيه ناس منهم كانوا فى التحرير ، و ناس تانيه راحوا عند مسرح البالون علشان سمعوا إنهم بيكرموا أهالى الشهدا هناك ، لقوا هناك فيه بلطجيه و إتضربوا هناك (نواره نجم رأيها إن إتعمل كمين ليهم) ، و بعديها الشباب لما وصلهم أخبار إن أهالى الشهدا بيتضربوا ، الناس نزلت الميدان و شباب منهم راح عند الوزارة (شفت تويت إمبارح إن المتظاهرين إتعاملوا بعنف مع أفراد الشرطه اللى كانوا عند الوزارة و حدفوهم بالطوب) ، و بعدين بدأ الأمن المركزى يحدف على المتظاهرين طوب و بدأوا يضربوا قنابل غاز و قنابل مسيله للدموع و خرطوش. و المعركه فضلت مستمره طول الليل ، الشباب اللى إتكلمت معاهم مش بلطجيه ولا ممكن يكونوا غلطوا إنهم حدفوا طوب على الداخليه و هم اللى بدءوا العنف ، لكن برضه المفروض الشرطه متصعدش الموضوع و تقلبه خناقه و تحدفهم بالطوب و القنابل و الخراطيش. و الفتره اللى كنت فيها هناك كل شويه أسمع كام قنبله ، و أشوف ناس مطلعينهم على الموتسيكلات مصابين ، الإصابات اللى المستشفى الميدانى ممكن يتعاملوا معاها كانت بترحلهم ، غير كده كانوا بيودهم لعربيات الإسعاف عند كنتاكى.

سيبوكم بقى من اللى حصل إمبارح و اللى حصل النهارده و اللى هيحصل بكره ، خلونا فى اللى حصل من5 شهور، شباب زى الورد قتلهم قناصه ، و راح الشباب و إختفوا القناصه ، شباب إتقتلوا قدام الأقسام ، و قاللك إيه اللى وداهم قدام القسم ، اللى وداهم قدام القسم إن إخواتهم و قرايبهم إتضربوا و راحوا ياخدوا حقهم ، و فى الأخر راح الشباب برضه و”القيادات الأمنيه” فضلوا فى أماكنهم ولا كأن حاجه حصلت. العادلى يتعمل حواليه سياج بشرى علشان محدش يشوفوا محبوس ، مش فاهم ده ولاء للعادلى ولا إحنا بقينا “فجأه” بنحافظ على معنويات المحبوسين. مش هنهدى إلا لما يغيروا من أسلوبهم ، مش هنهدا إلا لما يبقى ولائهم للشعب مش لناس المفروض يكونوا خدامين للشعب ، و لو إحنا هدينا ، فيه أهالى للشهدا مستعدين يموتوا و ياخدوا حقهم بإديهم ولا إنهم يحسوا إن دم ولادهم راح هدر.

من الأخر يا ساده: عداله بطيئه يعنى ظلم على ظلم للمظلوم ، و نصره للظالم.

 

This slideshow requires JavaScript.

عن التحرش الجنسى: الإحترام للآخر لا يتجزأ #EndSh

للأسف مشكلة التحرش الجنسي في مصر معقده و متداخله زي باقي مشاكل المجتمع المصري ، بس هحاول أعبر عن الموضوع من وجهة نظري.

متربيين علي الخوف  ، لو عملت حاجه غلط و لو حتي اعترفت بيها يبقي نهارك إسود ، إنت إزاي بتغلط ، و كمان بجح و بتعترف بغلطك ، حتي الإعتراف مش شجاعه ، الإعتراف بجاحه ، منطق عجيب ، بس الحمدلله إنها جت علي قد كده و اتربينا و منحرفناش ، أو انحرفنا بس ربنا كرمنا و رجعنا تاني.

المهم المتحرش ده مش كائن فضائي ولا إنسان آلي ، ده إنسان زيه زيك بالظبط ، لكن نشأته كانت مختلفه عن نشئتك ، و فيه احتمال كبير جدا إنك لو مربيتش ابنك كويس انه يعمل كده عادي جدا من غير ما ضميره يأنبه. طب إيه علاقة ده بالتربيه و الإعتراف بالخطأ اللي أنت جبت سيرتهم في الاول دول ، ولا هو أي كلام بتقوله تملي بيه التدوينه و خلاص؟؟؟ ، هقولك يا عم بس أصبر علينا

حوالي 90% من اللي كانوا معايا في المدرسه تحرشوا بالقول و الفعل و النظرات و الإيحاءات ، و الموضوع بالنسبه ليهم عادي جدا ، ماهو محدش قاله إن ده غلط ، أو غلط بس مش كبير قوي ، أو غلط كبير بس ماهو كله بيعمل كده. لو كان عندنا في ثقافتنا الإعتراف بالخطأ شجاعه مش بجاحه ، كان الولد ده لو حس بلحظة ندم علي اللي عمله هيروح يقول لابوه أو أمه أو حتي مدرس بيثق فيه ، بس يقول لمين يابا ، ده بس لو لمح انه عمل كده هيطلع عينه ، و مش بعيد يفضحوه في العيله كمان.

و طبعا اللي هيربي ابنه علي الإعتراف ، بالخطأ ، هيربيه برضه علي “احترام” الآخرين و احترام ممتلكاتهم و أجسادهم و رأيهم. وهيربيه برضه علي عدم السكوت عن أي حاجه غلط تحصل قدامه .

طب بالنسبه للي خلاص اتربي ، نعمل فيه إيه ده ، نربيه من تاني؟؟ ، هو التربيه من تاني شيء صعب ، اللي نقدر نعمله معاهم هو:
–  حملات توعيه علي نطاق واسع في التلفزيون/السينما/الراديو/الصحف/ملصقات/منشورات في الجامعات و المدارس و النوادي و المساجد و الكنايس.
– تطبيق القانون بشكل فوري و حازم و حاسم علي أي متحرش ، و توعية ظباط و أمناء الشرطه نفسهم بـ كيفية التعامل مع مثل هذه الحوادث.
– أي بنت تركب تاكسي تتصل – أو تعمل إنها بتتصل – بحد من قرايبها و تقولهم أنا ركبت تاكسي و النمر بتاعته – و تروح مملياهم نمرة التاكسي – و لو هو مين مش هيقربلها و هيخاف.
– بالنسبه للمترو ، بالله عليكم يا بنات التزموا بعربيات السيدات – و بالنسبه للاتوبيسات تجنبوهـا ، دي ملهاش حل 🙂
– متخفيش لو حد إتحرش بيكي و حاولي تعلي صوتك و إنتي بتكلميه – بإحترام – علشان تكسبي الناس في صفك ، و متحاوليش تستفزي الناس بجمل زي: هو انتوا معندكوش اخوات بنات ، متنقليش الخناقه مع الناس ، ركزي مع المتحرش نفسه
– متتكسفيش لو واحد واقف علي باب حاجه و سادد السكه و سايبلك حته صغيره تعدي منها – علي باب مترو/الجامعه ، الخ – إنك تطلبي منه يوسع ، و متتحركيش الا لما يوسعلك
– مش هنقول بلاش تلبسي مش عارف إيه ، البسي براحتك ، بس ارجوكي احترمي الناس برضه في لبسك.

بالنسبه بقي للحلول  طويلة المدي ، هي القضاء علي الأمراض الإقتصاديه و الإجتماعيه ، مثل : القضاء علي البطاله و تأخر سن الزواج و توفير مساكن للشباب و وضع مناهج للأخلاق لمختلف المراحل التعليميه  ، و حاجات كتير كتير بس نبدأ

و في النهايه مقدرش أقول غير :

انما الامم الاخلاق ما بقيت فان هموا ذهبت اخلاقهم ذهبوا 

أحترم الدكتور العوا .. و لكن

صدمت من  هذا الخطاب الذي أعلن فيه العوا ترشحه للرئاسه ، الخطاب مليء بتوزيع الإتهامات و التخوين لأصحاب الرؤي السياسيه المخالفه ، و مديح للمجلس العسكري ، و إذا افترضنا انه يستحق المديح ، كان من الواجب ان “تتجنب الشبهات” يا دكتور.

قام بشن هجوم “عنيف” علي عصام شرف و يحيي الجمل ، أنا أعلم ان يحيي الجمل كانت له اخطاء بالجمله في الفتره الماضيه ، و لكني اري هجومه علي شرف غير مبرر و مبالغ فيه و حمل تصريحاته اكثر مما يحتمل. من حق عصام شرف ان يبدي وجهة نظره “الشخصية” في أي من قضايا الوطن ، و من حقه ان يختلف مع رأي الأغلبيه ، طالما ان هذه الرؤيه لا تؤثر في القرارات الرسميه و التشريعات القانونية . و أنا لم أسمع شرف ينادي بـ “إعادة الإستفتاء” كما يدعي العوا ، لقد سمعت مداخلته التي اعلن فيها رأيه الشخصي ، و لم يتحدث عن أي اعادة.

و بالنسبه ل يحيي الجمل – علي الرغم من كل تحفظاتي – أخر مره سمعته يتحدث عن موضوع الدستور ، و كان في برنامج عمرو خالد و كان ضيف الحلقه عصام سلطان ، أبدي الجمل رأيه “الشخصي” في هذا ، و أبدي اعجابه بفكرة الإتفاق علي بعض المواد “الفوق دستورية” التي تعتبر حلا وسطاً ، بعض المواد التي تضمن “للجميع” الحد الأدني من الحقوق و الحريات المتفق عليها.

و لم يعجبني المدح – المبالغ فيه – للمجلس العسكر ، و لم أسمعه يتحدث عن أي سلبيه تذكر لهم في ادارة الفتره الماضيه ، لن أتدخل في النوايا لتفسير هذا ، و لكن من حق الدكتور ان يمدح ، و من حقي ان اضع علامات استفهام و ابحث عن إجابة.  و لنتذكر ان من جلب الحريه لهذا الشعب هو الشعب نفسه ، من قدم تضحيات هو الشعب ، من ثار ضد الظلم هو الشعب ، من يسعي الي الديمقراطيه و تحقيق العداله هو الشعب ، من يحمي مصر و المصريين هو الشعب ، و ليس من حق أحد ادعاء ان ينسب لأي جهه الفضل في ذلك.

و يا دكتور لقد سمعتك كثيرا و دائما كنت تتحدث عن الفكره و عن الرؤيه ، ماذا حدث و قد انقلب حديثك ليتحول الي انتقاد الأشخاص و تحويل الموضوع الي صراع. تمنيت ان تكون قد تعلمت مما حدث في حوارك الشهير علي الجزيرة . هل يصل الأمر ان تصف من يدعو المجلس العسكر الآن بالدستور أولا بـ “شياطين الأنس” ، ماذا حدث لك ، أين تقبل الأخر و احترامه و ثقافة الإختلاف ، أنا اعتبر ان هذه سقطه و ارجو ألا تتكرر.

أنا الآن احترم رأي الأغلبيه ، و أحترم من قال الإنتخابات أولا ، و في نفس الوقت أحترم من يري ان الدستور يجب ان يأتي في المرتبه الأولي ، و أيضا احترم من ينادي بوضع بعض المواد االفوق دستورية لطمأنة الجميع ، لأنني أعلم انهم جميعا يحبون مصر و لكن كل منهم يري الإصلاح من زاوية معينه. و حتي لو وجد بينهم غير ذلك فأنا لا اري انه من الحكمه ان يعمم أحد و يصف من ينادي بـ الدستور أولا بأنه من شياطين الإنس.

لقد سحب هذا الخطاب من رصيد العوا لدي ، و من رصيد حزب الوسط أيضا.

أرجو ان تعيد حساباتك في الفتره القادمه  ، و ان تكون اكثر حيطه و حذر عندما تتحدث عن الآخرين.  و اتمني لك التوفيق كما أتمناه للجميع.

انتخابات مجلس الشعب 2010: مابين خليك ايجابي – و وصمة العار – و الطمأنه علي مستقبل الأولاد – و الامل

حكايتي مع الجوله الاولي لانتخابات مجلس الشعب 2010:

الأمور مشيت بشكل كويس أول النهار .. الدنيا مكنتش زحمه قوي امام اللجنه .. امين الشرطة شاف بطاقتي + البطاقه الأنتخابيه  .. دخلت و صوت .. ابطلت صوتي بالنسبه لكوتة الكتكوتة .. و انتخبت اتنين من المعارضه .. و وانا خارج لقيت حد بيسأل الموظف اللي ماسك اللجنه: “اختار كام واحد؟” .. رد عليه الموظف بمنتهى الثقه:” واحد في الورقه دي .. و واحد في الورقه دي” .. صححتله المعلومه إن المفروض كل ناخب يختار اتنين و اتنين – كنت هكمل و اقوله بس ابعد عن الهلال و الجمل .. بس مرضيتش لحسن مندوب الوطني يهب في وشي – في الاول الموظف قال : “هم قالولي  كده” .. و فكر شويه و قال: “أنت معاك حق” .. و كان باين على الموظفين حالة اللخبطه و عدم الفهم.

قابلت واحد من زملاء العمل و قال لي “دي وصمة عار” .. و هو يشاور الي اصبعي الفسفوري … الكلمه استفزتني جدا .. رديت عليه إنها ليست وصمت عار .. و لكن العار هو الصمت .. و حينها تدخل زميلين و ايدوني  و حكوا لي عن رحلتهم الي قسم الشرطة لمعرفة ارقامهم الأنتخابيه و حكي لي احدهم الآتي:

ذهبت لاستلم بطاقتي الانتخابيه من قسم الزاويه الحمرا .. قالت لي الموظفه انه علي ان اترك اسمي لكي يعرض على “رئيس المباحث” .. و لما حاولت ان افهم لماذا .. لم اجد جواب مقنع .. قلت اخدهم على قد عقلهم و اديهم اسمي – و أنا مش على راسي باطحه – و ذهبت اكثر من مره لكي استلم البطاقه و لكن دون جدوي .. و اخر مره ذهبت اليها كانت قبل الانتخابات بيوم .. و قلتلها اديني طيب رقمي الإنتخابي .. قالتلي “روح هاته من الحزب الوطني” .. و علي الرغم من عدم منطقية هذا الطلب ذهبت .. و وجدت المقر مقفول .. “اجازة” ..

ثم ذهبت اللي العمل لأجد ان هناك زملاء آخرون مصابون بنفس عقدة الذنب زيي .. و غير راضين عن استسلامهم للسلبيه المفرطه التي اصبحت السمه الاساسيه للانسان المصري .. هذه الصفة التي لم يكتفي بأن يكون مريضا بهـا .. و لكن اصبح داعيا اليها .. و حكي أحد زملائي لي عن تجربته كالآتي:

ذهبت الي اللجنه وجدت تقريبا معظم الموجودين أمام اللجنه من شركات البترول – يسكنون داخل أو خارج الدائره .. فهذا لا يهم المهم سيادة الوزير يبقي سيادة النائب – و يجلس موظفون علي الارض حاملين أجهزة كمبيوتر محموله لمساعدة المرشحين في معرفة لجانهم و بالمره يوصوهم بأن يقدموا الدعم للهلال و الجمل .  ثم قالت لي امرأه “انتخب الباشمهندس سامح” .. فا قلتلها “لأ” .. و تحليلي إنها اكيد شغاله  تبع وزارة البترول بدليل استخدامها لكلمة “باشمهندس” .. ما علينا .. لاحظت الآتي في ورقة المرشحين:

1. مرشحة الإخوان “منال أبوالحسن” كانت تستخدم في الدعايه انها رقم 16 .. و لكن قاموا بتغيير رقمها الي رقم “25”.
2. مرشح الاخوان “عصام مختار” على الرغم من حصوله علي حكم لصالحه في حقه لخوض الانتخابات .. لم تتضمن ورقة المرشحين اسمه

و قابلت احدي زميلاتي  التي اخبرتني ان رئيس اللجنه “رفض” الإطلاع علي رقمها القومي للتأكد من شخصيتها – بعد طلبها منه ذلك.

طول هذا اليوم و أنا اتابع أخبار الانتخابات علي تويتر و كان هناك سيل من صور و فيديوهات و شهادات بمحاولات تزوير .. و بلطجه و تقديم رشاوي للناخبين .. و ايضا تأكيدات ممثل الحزب الوطني بنزاهة الانتخابات .. و كان الناس بتتكلم عن انتخابات هايتي و الحزب الوطني بيتكلم عن انتخابات نادي الشمس ..

و أنا مروح لقيت مرشح الحزب الوطني حاطط عربيه نص نقل جنب اللجنه اللي على أول الشارع اللي أنا ساكن فيه بتشغل الأغنيه الدعائيه بتاعته اللي بتقول “ناجح و هو ناجح” .. و بتحث الناس  علي تقديم الدعم للمرشح اللي كده كده ناجح .. ناجح .. يا جماعه هو اتولد و سموه علشان الحزب الوطني .. المهم .. لقيت ظابط في وشي بكام دبوره و نسر – و من الواضح انه محترم علشان مردش عليه بقلة ادب – و دار بيننا هذا الحوار القصير جدا:

هو مش المفروض حضرتك ممنوع الدعايه دلوقتي؟ .. هو: دعاية إيه؟ … شاورتله على العربيه و قلتله الدعايه دي .. حط ايده على كتفي و ابتسم ابتسامه عريضه و قال … “ماهو كله ممنوع” .. و شكرته و مشيت ..

و من الحاجات المضحكه إن كان فيه واحد واقف متابع المحادثه دي و هو بيبصلي و كأنه بيقولي .. أنت مجنون … حد يكلم ظابط شرطة  .. و كمان على كتفه نسر.

بس يا سيدي … و راحت معيطه – مصر طبعا.

 

بعدها بكام يوم سمعت من ناس كانوا مسكين لجان انهم طول عمرهم بيسمعوا عن التزوير .. و السنه دي أول مره يشوفوه بعنيهم .. والصناديق اللي بتتسرق و البلطجيه اللي بيتأجروا .. و العاهرات اللي بيتم الاستعانه بهم لاكمال عملية الدعاره السياسيه.

– بس يا سيدي ….  و راحت مزغرته .. المره دي بقى اللي زغرتت مرات النائب الوطني المحترم .. اللي كسب منصب .. و خسر نفسه.

 

أنا بقي مش هاحط فيديوهات التزوير علشان هي مغرقه الأنترنت ..أنا هاقدم الكلمتين دول اهداء للزعيم القائد .. بتسألوا الزعيم مين؟ .. أي زعيم .. مش مهم .. مادام أنا عارف انه عمره ما هيقره الكلمتين دول:

شعبك زياط .. مليان إحباط …….. من ساس راسه و لحد الباط

كوتة مرأة .. كوتة اقباط …….. كوتة عُمال .. كوتة ظباط

يرفع رجله .. شاور و أحاط …….. إن الفاسدين شعره في ملقاط

حزبك شعبي .. حزبي وطني …….. ناجح ناجح و بدون إزعاج

عندي حصانه من غير مجلس ……… عندي اموال أنا مش محتاج

…

طلعنا واحد .. نزلنا واحد .. أو زدنا واحد .. نقصنا واحد .. ماهو أصله قاعد ع الكرسي واحد .. و حزب واحد و عز واحد – امضاء: عبدالواحد

 

و لا يسعني غير إني أتشبث بالأمل .. و على رأي الشاعر:

أعلل النفس بالآمال أرقبها …  ما أضيق العيش لولا فسحة الأمل

 

الأمن و الانظمه الديموكتاتوريه و الشبكات الاجتماعيه – كلمات غير هادفة

لا يخفي علي أحد ان في بلادنا نعاني من “هاجس” امني عظيم و يتعاظم يوما بعد يوم، و لكن أي نوع من أنواع “الأمن” يا تري!! الانسان بطبيعة الحال يسعي دائما الي الشعور بالأمن و الامان، و للأمن فروع عديدة، هناك الأمن “الغذائي” و الأمن “الاجتماعي” و الأمن “الاقتصادي” و الأمن “المركزي” و هكذا  ….. في بلادي يسعي كل منا في تأمين مايريده من الأمن، هناك من يحالفه الحظ في ان ينال ما يتمنى و هناك من ينال الشهاده.

و في بلادي تتنوع المساعي و الرغبات كما تتنوع الأجهزة “الامنيه”،،، يسعي رجل الشارع الي ان يكون آمن في مأكله و مشربه و مسكنه، و يسعي رجل الأمن اللي تأمين “موكب” الرئيس!!

و هناك ايضا رجل “الانترنت” و هو من يهرب من الواقع أو الي الواقع عن طريق الشبكات الاجتماعيه و التخيلية،،،، و هذا النوع من المواطنين هو نوع جديد على الدولة و على أجهزة الأمن تماما ،،، هذا المواطن يريد “فضاءا” لكي يمارس فيه حريته و انسانيته بعد ما فقدها أثناء ارتياده “مترو” الانفاق (و منهم لله الحراميه) ..

و هذا المواطن صعب ادارته و السيطرة عليه من قبل أجهزة الأمن التي تمسك قبضتها على زمام الأمور و يفتح هو قبضته لكي “يدعي” على من ظلمه، و لكن ما العمل و قد ظهر هذا المواطن عديم الاحساس بالمسئولية و بتكلفة الكهرباء التي يستهلكها أثناء وجوده على هذا الفضاء “اللعين” ، هناك ازمة في الكهرباء و حرية التعبير في بلادي، و لكن الكهرباء تضيء بيت المسئولين و “حرية التعبير” تضيء قبور الشهداء.

من أيام سمعت عن حلقة “مصر النهارده” التي استضافت فيها “منى الشرقاوي” مجموعة من “الخبراء” ليتحدثوا عن الفيسبوك” ، و هو مساحة مستهلكة لاوقات المواطنين و لكهرباء السد العالي ايضا ، و طبعا تحدثوا عن “الخصوصية” التي نحترمها في بلادي إلى اقصي درجه ، فنحن دولة “مؤسسات” و “برلمانات” و “مهرجانات”،، و طبعا موقع ال “الفيسبوك” اللي تبع شركة “جوجار” (متل ما ارتأي المعد أو الخبير) العالميه هو مشكلة مصر و المصريين و لن نشعر بادميتنا إلا بعد ان نغلق حساباتنا على ال “الفيسبوك” و نوجه طاقتنا في تشجيع الاهلي و الزمالك و الاسماعيلي و ريال مدريد.

طبعا انتظر ان يقوم التلفزيون المصري العربي “المستقل” بتحضير حلقه اخري عن هذه “العصفوره” اللعينه المسماه “تويتر” ،،،،، علي الرغم من ان الانظمه “الديموكتاتوريه” تحب “العصافير” ، و لكن هذه العصفوره تخطت كل الحدود و الخطوط “الحمراء”. “العصافير” التي تحبها هذه الانظمه هي المدربه على نقل أخبار المعارضين و المنشقين التي لهم اجنده و نتيجه و كتب “خارجيه” … ايضا يحبون العصافير التي تستخدم لتحويل انتباه الشعب عن ما يحدث ….. “بص العصفوره” !!

ظهر هذا العام مصطلح “الشبكات الاجتماعيه” ، و قد أربك هذا المصطلح العديد من المثقفين و الباحثين و الامنيين ، لم تكن تعرف البلاد مثل هذه الشبكات ، نحن نعرف جميع الشبكات ، من شبكات الكهرباء الي شبكات الدعاره ، و نعرف جيدا كيف نتعامل مع جميع أنواع الشبكة بشكل امني  علمي ممنهج ، و لكن اختلف الجميع في تعريف واضح و ثابت ل “الشبكات الاجتماعيه” ، فكان القرار انه من اجل الحيطه و الحذر سوف يتم تصنيفها علي انها “شبكات دعاره الكترونيه” لحين اشعار اخر و لا عزاء “لمن ينادي”.

أنا اقترح علي الانظمه “الديموكتاتوريه” ان يعملوا علي وضع بعض التشريعات لضبط و تنظيم و تحجيم و تنجيم أداء الشبكات الاجتماعيه – و العياذ بالله

و سوف أبدأ أنا بمجموعه من الاقتراحات في “الكلمات غير الهادفه” القادمه إن شاء الله …..  إن كان في العمر بقيه.

أحمد عبد المنعم
eg.2@hotmail.com